Али Хашагульгов КЪАЬРА КХАЬРА АЛЬБОМ №32 ВАЙНАЬХ ДОГ

ХАШАГУЛЬГОВ АЛИ КЪАЬРА КХАЬРА Февраль-бетта ткъаь кхоалагlа ди, -- кхаьра, lаьрж да хьо са халкъа, даlа да даьра! Ма къаьра дера хьо, ва кхаьра, къаьра! -- Шовзткъеи диълаг1ча шерара кхаьра! Йиш лакха, йиш ала, са пандар, ала! lа бувца, lа хьоабе, са пандар, бала! -- Кхойтта шера латтаргда таьзет мехка, Бераш-истий-къоаной, оаш гlоазот дехка! Кlур хьайзар вай мехка, боад эттар lаьржа! Маьржа яl, -- доккха дар из хатар, -- маьржа! Маьрша-мукъа даьха вай тукхам кхелхар. Мел дукха цу lуйкъе вай адам кхалхар! Йиш ала, йиш лакха, са пандар, лакха! Лакха яр вай сийле, са пандар, лакха! Чухаьрцар, 1ояьржар вай Гlала -- гlойле! Дlа ма бейр кхуврчара цlе ала -- гlозле! Божа мо лехка мехках баьхар вайнах. Лаьтта эгар, сигле елхар... Ванагl, ма къаьра дера-кха из кхаьра, къаьра! -- Ка маьхала яьккха цу lура гlаьра! Хьо бека, са пандар, хьо белха, белха! Са пандара мерзаш, шо лелха, лелха! Са пандара пхаьнаш, шо хеда, хеда! Са бlаргашкара хиш, шо хьеда, хьеда! “Кхойтта шу, вайнах, Сибарегlа даккха!“ Гола йоацаш дисар кхоалаг1а дакъа. “Хье веллача ма воаллалва хьо, Стали!“ Са халкъо мел баьккхар бахар хьох, Сталин! Хьо када, хьо текъа, са пандар, текъа! Даькъастех зовне йиш, са пандар, лекха! Цlий леха, чlир леха, са г1етта белхам! Бекхам боацаш хlама дац лаьтта, бекхам! Февраль-бетта ткъаь кхоалагlа ди, -- кхаьра, Са халкъа хьо аьрга таьзет да даьра! Ма къаьра дера хьо, ва кхаьра, къаьра! -- Ка маьхала яьккха цу lурра гlаьра! Хьо бека, са пандар, хьо када, када! Са пандара мерзаш lа теда, теда! Кхоардам бе цlабахка гайнарех, кхоардам! Кодам бе гlоазота бейнарех, кодам! 1989 шу.