Өзүм дебей өлкөм деген БОЛОТ МАМБЕТОВ.

“Өмүр бизден өтүп кетсе, эл эмгектен эскерсин!” дейт акындарыбыз. Бүгүнкү каарманыбыздын бейнесине үңүлүп карашыбыздын себеби да анын артында калган тоодой эмгектери. Элибиздин башка баатырларындай болуп бул кишинин да аты-заты союз учурунда жаап жашырылган. Бирок биз эч токтобойбуз! Тарыхты казып чыгуу иштерин улантабыз. Казып жатып “Өлкөбүзөгү маанилүү иш-чаралардын, ачылыштардын көбүнүн ушул кишинин эмгеги менен салынган окшойт” деген ой кетти. Анткени ал өлкөбүздөгү өнөр жайлардын, окуу жайлардын, темир жана унаа жолдорунун, ГЭС, суу сактагычтардын курулушунда себепчи болгон инсан. Айтылуу Исхак Раззаковдун оң колу, анын үзөңгүлөшү, замандашы, көрүнүктүү мамлекеттик ишмер Болот Мамбетов. Ал бүтүндөй өмүрүн элинин жана мекенинин гүлдөп-өнүгүшүнө арнаган. Улуттун келечегин ойлоо менен, өлкөбүздүн өнүгүшүнө өз убагында кошкон зор эмгектери азыркы бакубат жашообуздун себебчиси болгон десек жаңылышпайбыз.