Аялдан акча аябаган эркек бай болот экен. Эрке бала Аргендин видеомаеги

Соцтармактардан жаш тамада жигиттин тойго келгендерди бийлетип, аларды коштоп ырдап жаткандагы видеосун көп эле кезиктирген чыгарсыз. Өзгөчө “Анда эмесе баштайлы“ деп жамактатып ырдаган ырлары балдардын, жаштардын арасында белгилүү болду. Бул — тамада Арген Эсенбай уулу Арген маекке чакырылган убакыттан бир мүнөт да кечикпей келди. Сөздөрүнөн да, мамилесинен да жөнөкөй, ийкемдүү экендиги байкалып жатты. Маектеш менен балалыгы, тамадалыктын алгачкы жылдары, акчага болгон мамилеси, тойдогу окуялар тууралуу баарлаштык. Айтымында, балалыгы жан дүйнөсү кыйналып өткөн. 1,5 жашында ата-энеси ажырашып кеткендиктен тайларынын, таенесинин колунда, интернатта чоңойгон. “Апамды аябай сагынчумун. Ал мени, эки карындашымды багуу үчүн иштегендиктен үч-төрт айда эки күнгө эле келчү. Ошол эки күн мен үчүн эң бактылуу күндөр эле. “Эмнеге менин атам жанымда эмес“ деген суроону өзүмө көп берчүмүн. Классташ балдардан “атам алып келди, атам иштеп келди“ деген сөздөрдү угуп эмнеге менде андай эмес деп кейичүмүн. Менин балалыктагы каалоом — атам, апам менен чогуу конокко баруу эле“, — деди Арген. Андан ары тойго аралашкандагы алгачкы жылдарда кеңеш берген адамдын жоктугунан кыйналганына токтолду. Анткен менен ал бир күнү ийгилик жылмаярына ишенчү. “Кайсы бир күнү жаш балдардын баары менин ырымды ырдап калышат деп ишенчүмүн“, — деген Эсенбай уулу он жылдык тамадалык жолунда материалдык абалын чыңдаганына каниет кылат. Ал мындай жетишкендик мырзалык, жигиттик жоопкерчиликти мойнуна ала билгендигинен улам болду деп эсептейт.