Қазақстаннан дәрігерлер неге қашып жатыр?

Пандемия басталғалы елдегі жағдайға қарап барлық саланың ақсап тұрғанына тағы бір көзіміз жетті. Соның бірі — медицинаның мәз емес халі. Вирус өршіп, індетті жұқтырғандар саны артқан кезде денсаулық саласында көп ауыс-түйіс жағдай орын алды. Министр ауысты, оған қоса бір жыл ішінде екі рет санитарлық дәрігер ауысып, кей шенеунік ақша жымқырды деген күдікке ілінді. Осы кезде көп уақыт отбасынан жырақта болып, вирустың дәл қасында жүрген — медицина қызметкерлері. Елде медицина қызметкерлерінің тапшылығы вирус өршіп тұрған уақытқа, яғни маусым-шілде айларына тұспа-тұс келді. Қазірдің өзінде 12,7 мың қызметкер жетіспейді. Ал деректер бойынша соңғы үш жылда 3500 медицина қызметкері Қазақстаннан көшіп кеткен. Көп қалада тиісті үстемақы ала алмағанын айтып жүргендері қаншама. “Билік медицина қызметкерлерінің еңбегін елеп, жеткілікті көңіл бөліп жүр ме?” деген сұрақ туындайды. Бүгінгі шығарылымда Қазақстандық медицинаға шолу жасайтын боламыз.