Xodaşirin Cəbiyev (Cabbari) - Hakənəy

HAKƏNE (Bə Tolışi bəzi ruşnəfamon ğədəğə vığandəm) Dınyo qardə, çərx peqardə şəvbəruj, Ha xəlğ boşdə ço pekardə şəvbəruj. Mujnən boşdə şələ bardə şəvbəruj, Vangi bekə, sədo roskə, hakənə. Co milləti vədə məşi, “mol” məbu, Har sıxani bə qəv məqət, kol məbu, Çəmə həxi paybaxş kardən, lol məbu, Sıxan bısdən, həxe bıvot hakənə. Tarıxədə tolışi nom, san heste, Meydonədə, canqonədə şan heste Potışoş hısd, bəqzodəş hıst, xan heste In zəfəron bə yod dənə hakənə. Tolış bəke, tarse bəke, hiç bıəni, Bə çəmə sə çiç başmardom oməni? Vəse tarsiş, bəşt bəsəpoy tı həni, Boy merd bıbu, hınə bıkə hakənə. Vey hıteku, dumut şeyku dast peqət, Bə tolışi hınəmandon dast bıqət, İşdə coni bə “Tolış”i boy dəqət, Zikkə bıjən, bıvot: “Hestim!” hakənə. Sıxani boy, bə vərz eğand, qəp bıjən, Dəmərəson dı sıxani çəp bıjən, Peqət sazi bə toloşi dəp bıjən, “Halay”, “Lo-lo” tı bəqəv biə hakənə. Har tərəfdə çəmə səpe səqıniən, Ve kəsonən bə hərçəmon dəqıniən. Yolə sığon pəxılon sə eqıninən, Deşmınon say, nəzə bıstən hakənə. In zəmini xıvand azim, yol azim, Meydonədə sərbaz azim, “Yol” azim, Atropati i kəş azim, xol azim, Biə ivoni tı bə arə hakənə. Zərdüşt ki bıə, Babək ki biə, zındəniş? Yadellion kə, ki xo karde, zındəniş? Ğərəboğdə boydəğ ki je, zındəniş? Mışdi rostkə, burə bıjən hakənə. Masallı ş. ü il. #atiştv #талыши #tolışon #talışlar #تالش #tolışəzıvon #talysh #talyshlanguage